Bir dövlətin gələcəyi onun gənc nəslinə verdiyi təhsillə və həmin təhsilin hansı ideoloji əsaslara söykənməsi ilə müəyyən olunur. 20 sentyabrda suverenliyimizin bütün ərazilərimizdə bərqərar olunması Qarabağda da təhsil sisteminin yenidən, milli ruhda dirçəldilməsi üçün həlledici addım oldu. Uzun illər düşmən əsarətində qalaraq xarabazara çevrilən bu torpaqlarda yenidən məktəblərin açılması, uşaqların gülüş səslərinin eşidilməsi mütləq zəfərin ən gözəl bəhrəsidir.
Prezident İlham Əliyev hər zaman təhsilin dövlət təməllərinin qorunmasında müstəsna rol oynadığını vurğulayır. Məhz Prezident İlham Əliyev tərəfindən həyata keçirilən təşəbbüslər sayəsində bu gün Şuşada, Füzulidə, Zəngilanda və digər azad edilmiş bölgələrimizdə ən müasir standartlara cavab verən məktəblər tikilib istifadəyə verilir. Həmçinin, Xankəndidə Qarabağ Universitetinin fəaliyyətə başlaması mütləq dövlət suverenliyinin gələcəyə hesablanmış ən intellektual möhürüdür.
Bu təhsil ocaqlarında böyüyən və oxuyan gənclər qalibiyyət ruhunu, vətənpərvərliyi və Azərbaycanın bütövlüyünü öz şəxsi təcrübələrində yaşayırlar. Orada tədris olunan hər bir dərs, oxunan hər bir kitab düşmənin illər boyu apardığı mədəni və tarixi saxtakarlığa vurulan ən böyük zərbədir. Suverenlik bizə təkcə torpaqlarımızı deyil, həmin torpaqlarda milli düşüncəni də yenidən cücərtmək imkanı verdi.
Dövlət Suverenliyi Günü qürurlu keçmişimizin olduğu qədər, həm də savadlı, maarifpərvər və işıqlı gələcəyimizin bayramıdır. Prezident İlham Əliyev tərəfindən gəncliyin inkişafı və Qarabağda elmin, təhsilin dirçəldilməsi üçün atılan hər bir addım müstəqil Azərbaycanın əbədi qüdrətini və yenilməzliyini təmin edən ən güclü investisiyadır.
Aytən İsmayılova,
YAP Nizami rayon təşkilatının fəalı
