Bakıda keçirilən Cənub Qaz Dəhlizi Məşvərət Şurasının 12-ci Nazirlər İclası və Yaşıl Enerji Məşvərət Şurasının 4-cü Nazirlər İclası çərçivəsində çıxış edən Azərbaycan Respublikasının Prezidenti Cənab İlham Əliyev ölkənin enerji siyasətinin strateji istiqamətlərini, regional və qlobal enerji təhlükəsizliyinə verdiyi töhfələri, eləcə də gələcək perspektivləri geniş şəkildə təqdim etdi. Cənab Prezident vurğuladı ki, Azərbaycan son illər ərzində həyata keçirdiyi uğurlu enerji siyasəti nəticəsində regionun ən etibarlı enerji tərəfdaşlarından birinə çevrilib və bu siyasət həm ənənəvi enerji resurslarının səmərəli istifadəsini, həm də bərpa olunan enerji sahəsində yeni imkanların yaradılmasını əhatə edir. Dövlət başçısı qeyd etdi ki, Avropa və Asiya arasında mühüm enerji körpüsü rolunu oynayan Cənub Qaz Dəhlizi layihəsi artıq özünü tam doğruldaraq iştirakçı ölkələr arasında güclü əməkdaşlıq platforması formalaşdırıb və bu təşəbbüs regionda enerji təhlükəsizliyinin möhkəmlənməsinə ciddi töhfə verir.
Prezident İlham Əliyev bildirdi ki, Azərbaycanın təşəbbüsü ilə reallaşan bu nəhəng enerji infrastrukturu yalnız iqtisadi layihə deyil, eyni zamanda ölkələr arasında strateji tərəfdaşlığı möhkəmləndirən mühüm siyasi platformadır. Onun sözlərinə görə, layihə çərçivəsində həyata keçirilən əməkdaşlıq iştirakçı dövlətlər arasında qarşılıqlı etimadı artırır, yeni investisiya imkanları yaradır və qlobal enerji bazarında sabitliyin qorunmasına xidmət edir. Dövlət başçısı xüsusilə vurğuladı ki, Azərbaycan qazının Avropa bazarına çatdırılması Avropa ölkələrinin enerji mənbələrinin şaxələndirilməsinə böyük töhfə verir və bu baxımdan Azərbaycan etibarlı təchizatçı kimi öz mövqeyini daha da möhkəmləndirib.
Cənab Prezident qeyd etdi ki, son illərdə qaz ixracının coğrafiyası genişlənib və Azərbaycan qazını idxal edən ölkələrin sayı artaraq regionda enerji əməkdaşlığının yeni mərhələsini formalaşdırıb. Prezident İlham Əliyev çıxışında Azərbaycanın enerji sektorunda əldə etdiyi uğurların təsadüfi olmadığını, bunun uzunmüddətli strateji planlaşdırma və beynəlxalq tərəfdaşlıq nəticəsində mümkün olduğunu vurğuladı. O qeyd etdi ki, ölkənin zəngin enerji resurslarının dünya bazarlarına təhlükəsiz və sabit şəkildə çatdırılması üçün həyata keçirilən layihələr Azərbaycanın iqtisadi inkişafına, enerji təhlükəsizliyinin təmin olunmasına və regionda sabitliyin gücləndirilməsinə xidmət edir. Cənab Prezident eyni zamanda diqqətə çatdırdı ki, dünya enerji bazarında baş verən dəyişikliklər yeni yanaşmalar və innovativ həllər tələb edir və Azərbaycan bu çağırışlara uyğun şəkildə öz enerji strategiyasını daim yeniləyir.
Bu baxımdan Yaşıl Enerji Məşvərət Şurasının iclası xüsusi əhəmiyyət daşıyır, çünki ölkə artıq yalnız ənənəvi enerji resurslarının ixracatçısı kimi deyil, həm də bərpa olunan enerji sahəsində regional mərkəz kimi çıxış etməyi hədəfləyir Prezident İlham Əliyev bildirdi ki, Azərbaycan günəş, külək və digər bərpa olunan enerji mənbələri baxımından böyük potensiala malikdir və bu potensialın reallaşdırılması istiqamətində mühüm layihələr həyata keçirilir. Dövlət başçısı qeyd etdi ki, Qarabağ və Şərqi Zəngəzur iqtisadi rayonlarında həyata keçirilən “yaşıl enerji zonası” təşəbbüsü ölkənin enerji transformasiyası strategiyasının əsas istiqamətlərindən biridir və bu bölgələrdə ekoloji cəhətdən təmiz enerji istehsalının artırılması planlaşdırılır. Cənab Prezident həmçinin vurğuladı ki, Azərbaycan beynəlxalq enerji şirkətləri ilə fəal əməkdaşlıq edir və bu əməkdaşlıq sayəsində ölkədə böyük həcmli investisiya layihələri reallaşdırılır. Bu layihələr həm enerji istehsalının artırılmasına, həm də yeni texnologiyaların tətbiqinə imkan yaradır.
Prezident İlham Əliyev bildirdi ki, Azərbaycan enerji siyasətində balanslı yanaşma tətbiq edir: bir tərəfdən ənənəvi enerji resurslarının səmərəli istifadəsi davam etdirilir, digər tərəfdən isə bərpa olunan enerji mənbələrinin inkişafı prioritet istiqamətlərdən biri kimi müəyyən edilib. Dövlət başçısının sözlərinə görə, bu siyasət ölkənin uzunmüddətli enerji təhlükəsizliyini təmin etməklə yanaşı, qlobal iqlim dəyişiklikləri ilə mübarizə səylərinə də töhfə verir. Cənab Prezident çıxışında qeyd etdi ki, Azərbaycan enerji layihələrini həyata keçirərkən həmişə beynəlxalq tərəfdaşlarla qarşılıqlı fayda prinsipi əsasında əməkdaşlıq edib və bu yanaşma ölkənin etibarlı tərəfdaş kimi nüfuzunu daha da artırıb. O vurğuladı ki, Cənub Qaz Dəhlizi layihəsinin uğuru da məhz iştirakçı dövlətlərin birgə səyləri və siyasi iradəsi nəticəsində mümkün olub. Prezident İlham Əliyev bildirdi ki, gələcəkdə bu layihənin genişləndirilməsi və yeni enerji marşrutlarının yaradılması istiqamətində də mühüm addımlar atılacaq.
Cənab Prezident çıxışının sonunda qeyd etdi ki, Azərbaycan enerji sahəsində əldə etdiyi uğurları davam etdirmək niyyətindədir və ölkə regional və qlobal enerji təhlükəsizliyinin təmin olunmasına bundan sonra da mühüm töhfələr verəcək. Dövlət başçısının sözlərinə görə, Azərbaycanın enerji strategiyası yalnız iqtisadi inkişafı təmin etməklə kifayətlənmir, eyni zamanda regionda əməkdaşlığın möhkəmlənməsinə, sabitliyin güclənməsinə və beynəlxalq tərəfdaşlığın genişlənməsinə xidmət edir. Beləliklə, Bakıda keçirilən bu mühüm iclaslar Azərbaycanın enerji diplomatiyasının gücləndiyini və ölkənin həm ənənəvi, həm də yaşıl enerji sahəsində qlobal enerji sistemində mühüm rol oynamağa davam etdiyini bir daha nümayiş etdirdi.
Sahil Əliyev,
Yeni Azərbaycan Partiyası, məsləhətçi
