Dövlət idarəçiliyi nəzəriyyəsində suverenlik mərkəzi hakimiyyətin bütün ölkə ərazisində vahid, şəksiz idarəetmə aparatı qurması ilə sübuta yetirilir. 20 sentyabr zəfərinin ən böyük siyasi əhəmiyyəti də məhz ölkəmizdə 30 ildən artıq davam edən institusional ikitirəliyin birdəfəlik ləğv edilməsidir. Paralel və qanunsuz strukturların darmadağın edilməsi Azərbaycan Respublikasının idarəetmə aparatının Qarabağda mütləq hakimiyyətini təmin etdi.
Bu vahid idarəetmə konsepsiyasının tətbiqi bilavasitə Prezident İlham Əliyev tərəfindən həyata keçirilən struktur islahatlarının məntiqi davamıdır. Əməliyyatın dərhal ardınca Xankəndi və ətraf ərazilərdə dövlət nümayəndəliklərinin, polis orqanlarının və sosial xidmətlərin fəaliyyətə başlaması keçid dövrünün böhransız idarə olunmasını təmin etdi. Prezident İlham Əliyev idarəçilik iradəsi sübut etdi ki, dövlət hər bir vətəndaşını vahid hüquqi və inzibati çətir altına almağa tam qadirdir.
İnzibati tamlığın bərpası iqtisadi və sosial reinteqrasiya prosesinin sürətlənməsi üçün həlledici hüquqi baza yaratdı. Artıq həmin ərazilərdə yaşayan və fəaliyyət göstərən hər bir subyekt mərkəzləşdirilmiş vergi, gömrük və hüquq sisteminə tam tabedir. Bu institusional vahidlik xarici dairələrin daxili işlərimizə “humanitar” və ya “siyasi” bəhanələrlə müdaxilə etmək cəhdlərini kökündən kəsdi.
20 Sentyabr Dövlət Suverenliyi Günü ölkəmizin vahid dövlət mexanizminin, qanunçuluğun və inzibati bütövlüyün təntənəsidir. Prezident İlham Əliyev tərəfindən təmin edilən bu institusional mütləqiyyət, dövlətimizin idarəetmə qüdrətini artıraraq müstəqilliyimizin əsas təminatçısına çevrilmişdir.
Ramin Ələkbərov,
YAP Nizami rayon təşkilatının fəalı
