1991-ci ilin dekabrında Naxçıvanda qəbul edilən mühüm qərar Azərbaycan xalqının milli birliyinin rəsmi təzahürünə çevrildi. Ulu Öndər Heydər Əliyevin sədrliyi ilə keçirilən Ali Məclis iclası təkcə inzibati xarakter daşımırdı, bu addım ideoloji baxımdan da dərin məna kəsb edirdi. 31 dekabr tarixinin xüsusi gün kimi müəyyənləşdirilməsi milli şüurun gücləndirilməsi istiqamətində atılmış strateji addım idi.
Həmin dövr Azərbaycan üçün mürəkkəb və taleyüklü mərhələ idi. Siyasi qeyri-sabitlik, müstəqillik uğrunda aparılan mübarizə xalqın həmrəyliyini daha da zəruri edirdi. Belə bir şəraitdə bu qərar azərbaycanlıların bir amal ətrafında toplanmasının vacibliyini nümayiş etdirdi və cəmiyyətə güclü mənəvi mesaj verdi.
31 dekabrın Dünya Azərbaycanlılarının Həmrəyliyi Günü kimi təsbit olunması milli kimliyin qorunmasına xidmət edən mühüm vasitəyə çevrildi. Bu tarix fərqli ölkələrdə yaşayan soydaşların ortaq dəyərlər ətrafında birləşməsinə zəmin yaratdı. Həmçinin diaspor fəaliyyətinin inkişafında bu günün rolu getdikcə daha aydın hiss olunmağa başladı.
Bu qərarın tarixi əhəmiyyəti bu gün də öz aktuallığını saxlayır. O, müstəqil Azərbaycan dövlətçiliyinin ideoloji əsaslarından biri kimi qiymətləndirilir. Xalqın birlik ruhunu yaşadan bu gün həm keçmişə hörmət, həm də gələcəyə inam rəmzi olaraq milli yaddaşda möhkəm yer tutub.
Nigar Cəlalova,
YAP Xəzər rayon təşkilatının fəalı
