“Prezident İlham Əliyevin Naxçıvanda Azərbaycan Televiziyasına verdiyi müsahibə regionun gələcək inkişaf modelinin konturlarını göstərən mühüm strateji mesajlarla yadda qaldı”.
Bunu Yeni Azərbaycan Partiyası Nizami rayon təşkilatının sədri Ramil Vəlibəyov deyib.
Ramil Vəlibəyov bildirib ki, Naxçıvan artıq yalnız Azərbaycanın ayrılmaz coğrafi hissəsi kimi deyil, Şərq-Qərb və Şimal-Cənub iqtisadi marşrutlarının kəsişdiyi yeni regional mərkəz kimi nəzərdən keçirilir: “Bu strategiyanın əsas sütunlarından biri nəqliyyat infrastrukturu və Zəngəzur dəhlizidir. Prezidentin açıqlamasına görə, Naxçıvan dəmir yolunun yeni texniki-iqtisadi əsaslandırma üzrə uzunluğu 194 kilometr, perspektiv yükaşırma qabiliyyəti isə ən azı 15 milyon ton nəzərdə tutulur. Layihənin Şərq-Qərb dəhlizi ilə yanaşı Şimal-Cənub marşrutuna inteqrasiyası Naxçıvanı lokal nəqliyyat sistemindən çıxararaq Avrasiya logistikasının mühüm qovşaqlarından birinə çevirə bilər. Beynəlxalq konsorsiumun yaradılması imkanının nəzərdən keçirilməsi isə layihəyə xarici kapital və potensial yükgöndərənlərin cəlb edilməsi baxımından xüsusi əhəmiyyət daşıyır”.
“İkinci strateji istiqamət enerji transformasiyasıdır” – deyən Ramil Vəlibəyov əlavə edib ki, Naxçıvanda 300 MVt-lıq istilik elektrik stansiyasının yaradılması, Günəş enerjisi potensialının 500–1000 MVt səviyyəsində qiymətləndirilməsi və ən azı 100 MVt-lıq enerji saxlanc sisteminin planlaşdırılması regionun enerji modelini dəyişə bilər: “Məqsəd yalnız daxili enerji təhlükəsizliyi deyil, Türkiyə, İran və perspektivdə Avropaya elektrik enerjisinin ixracıdır. Bununla Naxçıvan istehlakçı regiondan enerji istehsal və tranzit mərkəzinə çevrilə bilər.
Müsahibənin iqtisadi baxımdan digər mühüm mesajı Naxçıvan Sənaye Parkının yaradılmasıdır. Yeni istehsal müəssisələri, logistika imkanları, enerji infrastrukturu və nəqliyyat dəhlizlərinin paralel inkişafı regionda özəl investisiyalar üçün tamamilə yeni iqtisadi ekosistem formalaşdıra bilər.
Bütün bunların fonunda Naxçıvan, Qarabağ və Şərqi Zəngəzurun vahid inkişaf konsepsiyası əsasında formalaşdırılması xüsusilə diqqət çəkir. Bu yanaşma göstərir ki, Azərbaycanın regional inkişaf siyasəti yeni mərhələyə keçir: ayrı-ayrı layihələr əvəzinə nəqliyyat, enerji, sənaye, şəhərsalma, turizm və idarəetməni birləşdirən inteqrasiya olunmuş iqtisadi məkan yaradılır”.
Ramil Vəlibəyov vurğulayıb ki, Naxçıvanın qarşıdakı illərdəki rolu yalnız regional inkişafla məhdudlaşmaya bilər: “Reallaşdırılması nəzərdə tutulan layihələr tam miqyasda həyata keçirilərsə, Naxçıvan Azərbaycanın Avrasiyanın nəqliyyat və enerji xəritəsində mövqeyini gücləndirən əsas strateji platformalardan birinə çevrilə bilər”.
