Gələcəyə aparan texnologiya yolu
| Texnoloji inkişaf bu gün milli gücün və müasir dövlətçilik anlayışının əsas göstəricilərindən biridir. Azərbaycan üçün də bu istiqamət strateji prioritet sayılır. Rəqəmsal transformasiya, innovasiya ekosistemlərinin qurulması və süni intellekt texnologiyalarının tətbiqi ölkənin gələcək inkişaf modelinin əsas sütunlarını təşkil edir. Prezident İlham Əliyevin rəhbərliyi ilə həyata keçirilən siyasət texnologiyanı yalnız iqtisadi artım vasitəsi kimi deyil, həm də milli təhlükəsizlik və müstəqillik amili kimi qiymətləndirir.
Son illərdə həyata keçirilən rəqəmsal layihələr, startap təşəbbüsləri və innovasiya mərkəzləri bu istiqamətdə böyük irəliləyişin göstəricisidir. “ASAN xidmət” və “e-hökumət” kimi layihələr dövlət idarəçiliyində texnologiyanın real gücünü nümayiş etdirmiş, vətəndaş məmnuniyyətini artırmışdır. Bu model indi region ölkələri üçün nümunə hesab olunur. Texnoloji tərəqqinin davamlı olması üçün əsas hədəf insan kapitalının inkişafıdır. Gənclərin IT təhsili, rəqəmsal bacarıqların artırılması və elmi-tədqiqat yönümlü layihələrin dəstəklənməsi bu siyasətin ayrılmaz hissəsidir. Azərbaycan artıq istehlakçıdan istehsalçı mərhələsinə keçməyə doğru addımlayır. Bu səbəbdən texnoloji inkişaf sadəcə iqtisadi prioritet deyil, həm də gələcək nəsillərin təminatıdır. Müasir dünyada güclü olmaq – innovasiyalara açıq olmaq deməkdir. Azərbaycan bu istiqamətdə irəliləməyə, rəqəmsal gələcəyini öz əlləri ilə formalaşdırmağa qətiyyətlə qərarlıdır. Günay Şahverdiyeva
|
