Azərbaycan Prezidenti İlham Əliyevin Özbəkistanın Milli İnformasiya Agentliyinə verdiyi müsahibə iki qardaş ölkə arasındakı münasibətlərin sadəcə dostluq və əməkdaşlıq çərçivəsində deyil, daha geniş geosiyasi müstəvidə inkişaf etdiyini göstərən mühüm siyasi mesaj kimi qiymətləndirilə bilər.
Müsahibənin əsas siyasi xətti ondan ibarətdir ki, Azərbaycan və Özbəkistan artıq yalnız ikitərəfli münasibətləri inkişaf etdirən dövlətlər deyil, Cənubi Qafqazla Mərkəzi Asiya arasında yeni bağlantılar yaradan strateji tərəfdaşlardır. Xəzər dənizi bu prosesdə ayırıcı deyil, əksinə, iki regionu birləşdirən mühüm geosiyasi körpü rolunu oynayır.
Prezident İlham Əliyevin vurğuladığı Orta Dəhliz, nəqliyyat-logistika layihələri, investisiya əməkdaşlığı və enerji istiqamətləri Azərbaycanın Mərkəzi Asiya ilə münasibətlərə uzunmüddətli strateji baxışının göstəricisidir. Azərbaycanın Mərkəzi Asiya Dövlət Başçılarının Məşvərət görüşlərində iştirakı isə ölkəmizin regionda artan siyasi çəkisinin göstəricilərindən biridir.
Azərbaycan-Özbəkistan münasibətlərində diqqət çəkən digər məqam siyasi müttəfiqliyin iqtisadi layihələrlə möhkəmləndirilməsidir. Ticarət dövriyyəsinin artması, birgə investisiya mexanizmlərinin yaradılması və işğaldan azad edilmiş ərazilərin bərpasında Özbəkistanın iştirakı iki ölkə arasında etimadın yalnız siyasi bəyanatlarla deyil, real layihələrlə də ifadə olunduğunu göstərir.
Bu münasibətlərin Türk dünyası baxımından da xüsusi əhəmiyyəti var. Bakı və Daşkəndin Türk Dövlətləri Təşkilatı çərçivəsində fəal əməkdaşlığı göstərir ki, ortaq tarix və mədəniyyət artıq daha geniş siyasi və iqtisadi əməkdaşlıq imkanlarına çevrilir.
Müsahibənin ən mühüm siyasi mesajı isə budur: Azərbaycan öz xarici siyasətində regionlar arasında körpü yaradan dövlət kimi mövqeyini daha da gücləndirir. Bakı–Daşkənd xətti artıq iki paytaxt arasındakı münasibətlərdən daha böyük məna daşıyır. Bu xətt gələcəkdə Cənubi Qafqazı Mərkəzi Asiya ilə birləşdirən siyasi, iqtisadi və nəqliyyat əməkdaşlığının əsas istiqamətlərindən birinə çevrilə bilər.
İlham Əliyevin müsahibəsi bu baxımdan yalnız iki ölkənin dostluğunun ifadəsi deyil. Bu, Azərbaycanın dəyişən dünya düzənində öz regional mövqeyini necə qurduğunu göstərən siyasi baxışın mühüm ifadəsidir. Bakı ilə Daşkənd arasında möhkəmlənən münasibətlər iki dövlətin deyil, bütövlükdə daha böyük bir geosiyasi məkanın gələcək əməkdaşlıq modelini formalaşdırır.
Səbinə Həsənova,
YAP Nizami rayon təşkilatının fəalı
