Azərbaycanın son illərdə keçdiyi tarixi yol yeni nəsillərin dövlətçilik düşüncəsinin formalaşmasına böyük təsir göstərib. YAP VIII Qurultayı Zəfərdən sonra yetişən nəslin siyasi, ictimai və intellektual potensialının dövlətin gələcək inkişafına yönəldilməsi baxımından mühüm əhəmiyyət daşıyır. Qarabağın işğaldan azad edilməsi və suverenliyin tam bərpası artıq yeni nəsil üçün milli yaddaşın əsas səhifələrindən birinə çevrilir.
Ulu Öndər Heydər Əliyevin siyasi irsində gənc nəslin dövlətçilik ənənələrinə sədaqət ruhunda yetişdirilməsi xüsusi yer tuturdu. Ulu Öndər Heydər Əliyev təhsilli, dünyagörüşlü və vətənpərvər gəncləri Azərbaycanın gələcəyinin əsas təminatçısı hesab edirdi. Onun bu baxışı müasir dövrdə daha böyük əhəmiyyət kəsb edir, çünki yeni nəsil həm milli dövlətçilik dəyərlərini, həm də qlobal dünyanın mürəkkəb reallıqlarını mənimsəməlidir.
Prezident İlham Əliyevin rəhbərliyi ilə gənclər üçün təhsil, idman, innovasiya, məşğulluq və ictimai iştirak imkanlarının genişləndirilməsi yeni nəslin inkişafına mühüm zəmin yaradır. Zəfərdən sonra gənclərin Qarabağ və Şərqi Zəngəzurun bərpası prosesində iştirakı onların dövlət quruculuğuna praktiki töhfəsini artırır. Bu proses gənclərdə həm milli qüruru, həm də sosial məsuliyyəti gücləndirir.
YAP VIII Qurultayı Zəfər nəslinin siyasi düşüncəsinin formalaşdırılması baxımından xüsusi əhəmiyyət daşıyır. Bu nəslin nümayəndələri informasiya texnologiyalarını, xarici dilləri, beynəlxalq münasibətləri və müasir iqtisadi prosesləri yaxşı bilməli, eyni zamanda milli maraqların mahiyyətini dərindən anlamalıdırlar. YAP bu potensialın siyasi təşkilatlanmaya çevrilməsi üçün yeni platformalar yaratmalıdır.
Zəfər nəsli Azərbaycanın gələcəyinin qurucusudur. Onların qarşısında duran vəzifə yalnız qələbə tarixini qorumaq deyil, həmin qələbənin yaratdığı imkanları elm, texnologiya, iqtisadiyyat, mədəniyyət və dövlət idarəçiliyi sahələrində yeni uğurlara çevirməkdir. YAP VIII Qurultayı bu baxımdan tarixi Zəfərdən gələcəyin quruculuğuna aparan siyasi körpü kimi mühüm əhəmiyyət daşıyır.
Tofiq Rüstəmli,
YAP Nizami rayon təşkilatının “Babək prospekti, 2269-cu məhəllə, bina 1” ərazi partiya təşkilatının sədr müavini
