Azərbaycan Respublikasının Prezidenti İlham Əliyevin Xocalı Soyqırımı Memorial Kompleksinin açılış mərasimində etdiyi çıxış tarixi yaddaşın, milli həmrəyliyin və ədalət prinsipinin təntənəsi kimi dəyərləndirilir. Dövlət başçısı çıxışında iki il əvvəl təməli qoyulan bu möhtəşəm kompleksin artıq xalqın istifadəsinə verilməsini xüsusi vurğulayaraq, bunun sadəcə memarlıq abidəsi deyil, həm də milli yaddaşın rəmzi olduğunu bildirdi.
Prezident qeyd etdi ki, Xocalı soyqırımı Ermənistan dövləti və erməni silahlı birləşmələri tərəfindən azərbaycanlılara qarşı törədilmiş qanlı cinayətdir. Onun sözlərinə görə, bu faciə təkcə Azərbaycan xalqına deyil, bütün insanlığa qarşı yönəlmiş ağır hərbi cinayət idi. Bir gecənin içində 600-dən çox günahsız mülki şəxs – o cümlədən 106 qadın və 63 uşaq – xüsusi amansızlıqla qətlə yetirilmiş, 150 nəfər isə itkin düşmüşdür. Dövlət başçısı vurğuladı ki, sonrakı illərdə işğaldan azad edilmiş ərazilərdə tapılan insan qalıqları bu faciənin miqyasını bir daha sübut etmişdir. Çıxışda əsas mesajlardan biri tarixi həqiqətlərin heç vaxt unudulmayacağı və unudulmasına imkan verilməyəcəyi idi.
Prezident İlham Əliyev bildirdi ki, Azərbaycan dövləti Xocalı həqiqətlərinin beynəlxalq ictimaiyyətə çatdırılması istiqamətində ardıcıl və sistemli siyasət aparır. Bu memorial kompleks də həmin siyasətin mühüm tərkib hissəsidir. O, qeyd etdi ki, Xocalı soyqırımının hüquqi-siyasi qiymət alması üçün səylər davam etdiriləcək.
Prezident çıxışında 44 günlük Vətən müharibəsindən sonra yaranmış yeni reallıqlara da toxundu. O bildirdi ki, Azərbaycanın ərazi bütövlüyünün bərpası şəhidlərin qanının yerdə qalmadığını göstərdi. Xocalı qurbanlarının xatirəsi qarşısında baş əyən dövlət başçısı vurğuladı ki, artıq Azərbaycan öz suverenliyini tam təmin etmiş, tarixi ədaləti bərpa etmişdir. Bu baxımdan memorial kompleks yalnız keçmişin ağrısını deyil, həm də qürur və qələbə hissini ifadə edir. Nitqdə xüsusi olaraq vurğulandı ki, Azərbaycan xalqı heç vaxt qisasçılıq siyasəti aparmayıb, lakin ədalətin bərpasını daim tələb edib. Xocalı faciəsinin beynəlxalq hüquq çərçivəsində tanınması və məsul şəxslərin cəzalandırılması Azərbaycanın prinsipial mövqeyidir.
Prezident bildirdi ki, tarixi saxtalaşdırmaq cəhdləri nəticəsiz qalacaq, çünki faktlar və sənədlər həqiqəti açıq şəkildə ortaya qoyur. Memorial Kompleksin yaradılması həm də gələcək nəsillər üçün mühüm bir mesajdır. Bu abidə gənclərə tarixini unutmamağı, milli kimliyini qorumağı və vətənpərvərlik ruhunda böyüməyi aşılayır. Prezident İlham Əliyev qeyd etdi ki, dövlət tərəfindən şəhid ailələrinə və müharibə iştirakçılarına göstərilən diqqət və qayğı siyasəti bundan sonra da davam etdiriləcək. Sonda dövlət başçısı vurğuladı ki, Xocalı qurbanlarının xatirəsi Azərbaycan xalqının qəlbində əbədi yaşayacaq.
Memorial Kompleks isə bu yaddaşın daşlaşmış ifadəsi, gələcək nəsillərə ötürüləcək tarixi bir and yeridir. Onun sözlərinə görə, Azərbaycan güclü dövlətdir və heç bir faciə xalqın iradəsini sarsıda bilməz. Əksinə, belə ağrılı səhifələr milli birliyi daha da möhkəmləndirir və dövlətçiliyin əsaslarını gücləndirir. Beləliklə, Xocalı Soyqırımı Memorial Kompleksinin açılışı təkcə anım mərasimi deyil, həm də ədalətin, tarixi yaddaşın və milli ləyaqətin nümayişi kimi tarixə düşdü.
İsmayıl Nağızadə,
Yeni Azərbaycan Partiyası, Məsləhətçi
