2026-cı il oktyabrın 15-də Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Toplantısı keçirilib. Azərbaycan Respublikasının Prezidenti İlham Əliyevin tədbirdəki çıxışı regional təhlükəsizlik, beynəlxalq hüquqa hörmət, dövlətlər arasında qarşılıqlı etimadın gücləndirilməsi və çoxtərəfli əməkdaşlığın inkişafı kimi mühüm məsələləri əhatə edib.
Dövlət başçısı çıxışında Azərbaycanın beynəlxalq münasibətlər sistemində artan rolunu, Asiya ilə Avropa arasında əlaqələrin inkişafına verdiyi töhfələri və müstəqil xarici siyasətinin əsas prinsiplərini diqqətə çatdırıb. Prezident qeyd edib ki, ölkələr arasında siyasi, iqtisadi, nəqliyyat, enerji və humanitar sahələrdə əməkdaşlığın genişləndirilməsi regional təhlükəsizliyin və sabitliyin möhkəmlənməsinə xidmət edir.
Çıxışda beynəlxalq hüququn norma və prinsiplərinin ardıcıl şəkildə tətbiqinin vacibliyi xüsusi vurğulanıb. Prezident İlham Əliyev beynəlxalq təşkilatların qəbul etdiyi qərar və qətnamələrin icrasını təmin edən səmərəli mexanizmlərin yaradılmasının münaqişələrin qarşısının alınması və davamlı sülhün təmin edilməsi baxımından əhəmiyyətini qeyd edib.
Dövlət başçısı Azərbaycanın ərazi bütövlüyünün və suverenliyinin bərpasından, eləcə də regionda sülhün qorunması və möhkəmləndirilməsi zərurətindən bəhs edib. O, sülhün davamlı xarakter alması üçün qarşılıqlı etimadın gücləndirilməsinin və beynəlxalq hüququn tələblərinə əməl olunmasının vacibliyini diqqətə çatdırıb.
Prezident İlham Əliyev Azərbaycanın AQEM-ə ikiillik sədrliyi dövründə təşkilatın fəaliyyətinin gücləndirilməsi istiqamətində görülən işlərdən də danışıb. Nəqliyyat və bağlantılar, rəqəmsallaşma, ətraf mühitin mühafizəsi, turizm, təhsil və elm sahələrində əməkdaşlığın təşviqi təşkilatın fəaliyyətinin genişləndirilməsinə mühüm töhfə verib.
Zirvə Toplantısında Laos Xalq Demokratik Respublikasının AQEM-ə yeni üzv dövlət kimi qəbul edilməsi təşkilatın Asiya məkanında dialoq və əməkdaşlıq platforması kimi genişlənməsinin göstəricisi olub. Tədbir çərçivəsində qəbul edilən Bakı Bəyannaməsi isə dövlətlərin suveren bərabərliyi, ərazi bütövlüyünə hörmət və mübahisələrin sülh yolu ilə həlli kimi prinsiplərin əhəmiyyətini bir daha ön plana çıxarıb.
Azərbaycanın AQEM-ə sədrliyinin 2028-ci ilədək uzadılması təşəbbüsünə göstərilən dəstək ölkəmizin təşkilatın institusional inkişafı və fəaliyyətinin davamlılığının təmin edilməsi istiqamətində üzərinə götürdüyü məsuliyyətin davam etdirilməsi baxımından əhəmiyyət daşıyır.
Nəticə etibarilə, Prezident İlham Əliyevin AQEM-in VII Zirvə Toplantısındakı çıxışı regional əməkdaşlığın genişləndirilməsi, beynəlxalq hüququn prinsiplərinə hörmət, etimad mühitinin gücləndirilməsi və dayanıqlı inkişafın təşviqi məsələlərini gündəmə gətirib. Bakıda keçirilən Zirvə Toplantısı Azərbaycanın beynəlxalq dialoq platformalarının fəaliyyətinə verdiyi töhfələrin müzakirəsi və Asiya ölkələri arasında əməkdaşlığın gələcək istiqamətlərinin müəyyənləşdirilməsi baxımından mühüm əhəmiyyət kəsb edib.
Selcan Novruzova,
YAP Nizami rayon təşkilatının məsləhətçisi
