1994-cü il Azərbaycan üçün enerji sahəsində dönüş ili oldu. Məhz bu ildə ilk Beynəlxalq Xəzər Neft və Qaz Sərgisi keçirildi və bu sərgi ölkənin qlobal enerji bazarına çıxışının əsasını qoydu. Sərginin təşkil olunması həm dövlətin, həm də beynəlxalq şirkətlərin diqqətini Cənubi Qafqazın enerji imkanlarına yönəltdi.
Həmin dövr SSRİ-dən çıxmış və müstəqil inkişaf yoluna qədəm qoymuş Azərbaycan üçün olduqca mürəkkəb idi. Lakin “Əsrin müqaviləsi”nin də elə həmin il imzalanması bu sərginin təkcə texniki tədbir deyil, həm də strateji siyasi gediş olduğunu göstərdi. Sərgi vasitəsilə ölkə neft kapitalını cəlb etməyə, iqtisadi dayanıqlığını bərpa etməyə başladı.
İlk sərgi Bakı şəhərinin beynəlxalq enerji mərkəzinə çevrilməsi üçün bir başlanğıc idi. O zamandan etibarən bu tədbir müntəzəm olaraq keçirilərək Azərbaycanın enerji sahəsindəki nailiyyətlərini və irəliləyişlərini dünyaya təqdim etməyə başladı. Sərgi ilə yanaşı keçirilən forum və müzakirələr isə ölkənin enerji diplomatiyasına güc qatdı.
Bu gün həmin sərginin 30 illik yubileyi qeyd olunur. Bu fakt onu göstərir ki, 1994-cü ildə atılan addım təkcə bir tədbir deyildi – bu, strateji bir yolun başlanğıcı idi. Azərbaycan artıq bu yolun liderlərindən biridir və enerji sahəsində sabitlik və tərəqqi simvoluna çevrilib.
Fatimə Axundzadə
YAP Xəzər rayon təşkilatının fəalı
