Gənclər hər bir ölkənin gələcəyini formalaşdıran əsas qüvvədir və Azərbaycan gəncliyi də müasir cəmiyyətin inkişafında əvəzsiz rol oynayır. Müasir Azərbaycan gəncliyi yüksək səviyyəli təhsil alaraq ölkənin inkişafına bilikləri ilə töhfə verir. Xarici və yerli ali təhsil müəssisələrində təhsil alan gənclər elm, texnologiya, iqtisadiyyat və digər sahələrdə ölkənin güclənməsinə töhfə verirlər. Gənclər dövlət qurumlarında, qeyri-hökumət təşkilatlarında və siyasi strukturlarda aktiv iştirak edirlər. Dövlətin dəstəyi ilə həyata keçirilən Gənclər Fondu, ASAN Xidmət kimi layihələr gənclərin idarəetmə proseslərinə inteqrasiya olunmasına şərait yaradır.
Rəqəmsal dünyada Azərbaycan gəncləri böyük uğurlara imza atır. Startap layihələri, texnoloji həllər və innovasiyalar ölkəmizin dünya bazarına inteqrasiyasını təmin edir. Gənclər həm də beynəlxalq layihələrdə ölkəni təmsil edərək Azərbaycanın müsbət imicini gücləndirirlər. Azərbaycan gəncliyi ölkənin ərazi bütövlüyü uğrunda canlarını fəda edərək, yüksək vətənpərvərlik nümunəsi göstərmişdir. 44 günlük Vətən müharibəsində Azərbaycanın Zəfər qazanmasında gənclərin xüsusi rolu unudulmazdır. Hərb sahəsindəki gənclər həm peşəkar bacarıqları, həm də ruh yüksəkliyi ilə ölkənin müdafiəsində dayanırlar.
Azərbaycan dövləti gənclərin inkişafı üçün geniş imkanlar təmin edir. Təhsil almaq, sahibkarlıqla məşğul olmaq, beynəlxalq təcrübə əldə etmək üçün gənclərə dəstək verən fondlar və dövlət proqramları mövcuddur. “Azərbaycan 2030: Dayanıqlı İnkişaf Strategiyası” çərçivəsində gənclərin daha geniş sahələrdə rol alması üçün xüsusi layihələr nəzərdə tutulur. Azərbaycan gəncliyi dövlətin və cəmiyyətin əsas sütunlarından biridir. Onların bilikləri, bacarıqları və təşəbbüskarlığı ölkəmizin gələcək inkişafının təminatıdır. Gənclər öz fəaliyyətləri ilə sübut edirlər ki, müasir Azərbaycan dünya miqyasında güclənməkdə davam edəcək. Dövlətin dəstəyi və gənclərin enerjisi ilə həm daxili, həm də beynəlxalq arenada uğurlarımız artmağa davam edəcəkdir.
Əliəkbər Novruzov,
YAP Xəzər rayon təşkilatının gənc fəalı
