Bakı son illərdə yalnız siyasi və diplomatik görüşlərin keçirildiyi məkan deyil, həm də dünyanın iqtisadi qərarlarının müzakirə olunduğu mühüm platformalardan birinə çevrilir. II Azərbaycan Beynəlxalq İnvestisiya Forumu çərçivəsində Prezident İlham Əliyevin iştirakı ilə keçirilən tədbir də bu reallığın növbəti göstəricisi oldu.
Tədbirin əsas mahiyyətini yalnız investisiya rəqəmlərində axtarmaq doğru olmazdı. Burada daha böyük bir mənzərə var: Azərbaycan öz iqtisadi potensialını artıq gələcək üçün yeni imkanlara çevirməyə çalışır.
Prezident İlham Əliyevin çıxışında diqqət çəkən əsas məqamlardan biri Azərbaycanın son illərdə yaratdığı iqtisadi və infrastruktur bazasının gələcək inkişafın təməli kimi təqdim olunması idi. Son 20 ildə ölkəyə 350 milyard dollardan artıq investisiyanın cəlb edilməsi Azərbaycanın beynəlxalq biznes üçün formalaşdırdığı iqtisadi mühitin miqyasını göstərir.Lakin qarşıdakı mərhələnin fərqi ondadır ki, Azərbaycan yalnız mövcud imkanlarını qorumaqla kifayətlənmir. İqtisadi gündəlik dəyişir. Enerji, logistika, nəqliyyat, rəqəmsal texnologiyalar, yeni istehsal sahələri və qeyri-neft sektorunun inkişafı ölkənin gələcək iqtisadi xəritəsində getdikcə daha böyük yer tutur.
Xüsusilə enerji sahəsində yeni yanaşma diqqət çəkir. Azərbaycanın məqsədi yalnız enerji resurslarını ixrac etmək deyil, həm də bərpaolunan enerji potensialını iqtisadi üstünlüyə çevirməkdir. Xəzərin Azərbaycan sektorunda böyük külək enerjisi potensialının mövcudluğu bu istiqamətdə ölkənin qarşısında yeni perspektivlər açır.Digər mühüm istiqamət Azərbaycanın coğrafiyasını iqtisadi üstünlüyə çevirməsidir. Dəmir yolları, avtomobil yolları, liman və digər infrastruktur layihələri artıq təkcə ölkədaxili inkişafın elementi deyil. Azərbaycan özünü regionlararası yük və ticarət axınlarının mühüm hissəsinin keçə biləcəyi bir məkan kimi formalaşdırır.
Burada siyasi sabitliklə iqtisadi inkişafın bir-birindən ayrı olmadığını da görmək mümkündür. İnvestor üçün yalnız maliyyə imkanları deyil, uzunmüddətli proqnozlaşdırıla bilənlik, təhlükəsizlik və tərəfdaşlıq münasibətləri də əhəmiyyət daşıyır. Prezidentin forumdakı çıxışı Azərbaycanın məhz bu amilləri özünün əsas üstünlüklərindən biri kimi təqdim etdiyini göstərdi.Azərbaycanın qarşısında duran növbəti məsələ isə əldə edilmiş iqtisadi imkanları daha yüksək əlavə dəyər yaradan sahələrə yönəltməkdir. Qeyri-neft sektorunun genişləndirilməsi, ixracın şaxələndirilməsi və beynəlxalq texnologiya və təcrübənin ölkəyə gətirilməsi bu baxımdan xüsusi əhəmiyyət daşıyır. Prezidentin də qeyd etdiyi kimi, qarşıdakı dövrdə əsas məqsədlərdən biri neft-qaz sektorundan kənarda mövcud potensialdan daha geniş istifadə etməkdir.
Səbinə Həsənova,
YAP Nizami rayon təşkilatının fəalı
