Cəbrayılın azadlığı – Zəfər tariximizin parlaq səhifəsidir
4 oktyabr Azərbaycan xalqının yaddaşında xüsusi qürur və iftixar hissi ilə qeyd olunan əlamətdar tarixlərdən biridir. Bu gün Cəbrayıl şəhərinin işğaldan azad edilməsinin rəmzi olaraq tariximizdə özünəməxsus yer tutur. 2020-ci il 4 oktyabr tarixində Müzəffər Azərbaycan Ordusunun qəhrəmanlığı və şücaəti nəticəsində Cəbrayıl şəhəri Ermənistan silahlı qüvvələrinin işğalından azad edildi. Cəbrayıl Vətən müharibəsi zamanı işğaldan azad olunan ilk şəhər olmaqla Zəfər yolunun mühüm başlanğıc nöqtələrindən birinə çevrildi. Prezident İlham Əliyevin 31 iyul 2023-cü il tarixli Sərəncamı ilə 4 oktyabrın Cəbrayıl Şəhəri Günü kimi təsis edilməsi isə bu tarixi hadisənin əhəmiyyətini bir daha təsdiqlədi.
Cəbrayılın tarixi Azərbaycan xalqının qədim dövlətçilik və milli-mənəvi dəyərləri ilə sıx bağlıdır. 1993-cü il avqustun 23-də işğala məruz qalan rayon uzun illər ərzində doğma torpaqlarından ayrı düşmüş insanların ağır həsrətinə şahidlik etdi. İşğal illərində Cəbrayılın yaşayış məntəqələri, tarixi və mədəni irsi böyük dağıntılara məruz qaldı. Lakin bütün bu çətinliklər Cəbrayıl sakinlərinin doğma torpağa bağlılığını, geri qayıdış ümidini və Vətən sevgisini sarsıda bilmədi. Bu gün Cəbrayılın azadlığı həmin insanların illərlə ürəyində yaşatdığı arzunun gerçəkləşməsi kimi xüsusi məna daşıyır.
2020-ci ilin 27 sentyabrında başlayan Vətən müharibəsində Azərbaycan Ordusunun qarşısında duran əsas məqsədlərdən biri işğal altında olan torpaqlarımızın azad edilməsi idi. Cəbrayıl istiqamətində aparılan döyüşlər Azərbaycan əsgər və zabitlərinin yüksək peşəkarlığını, əzmkarlığını və Vətənə sədaqətini nümayiş etdirdi. 4 oktyabrda Cəbrayıl şəhərinin azad edilməsi xalqımıza böyük ruh yüksəkliyi bəxş etdi və sonrakı Zəfərlərə gedən yolun mühüm mərhələlərindən biri oldu. Bu qələbə Azərbaycan Ordusunun gücünü və torpaqlarımızın azadlığı uğrunda göstərilən fədakarlığın miqyasını bir daha ortaya qoydu.
Cəbrayılın azad olunması ilə Azərbaycanın üçrəngli Dövlət Bayrağı yenidən doğma torpaqlarda dalğalanmağa başladı. Xüsusilə Xudafərin körpülərində Azərbaycan bayrağının ucaldılması milli tariximizin ən yaddaqalan hadisələrindən biri kimi yadda qaldı. Bu mənzərə yalnız bir ərazinin azadlığını deyil, həm də tarixi torpaqlarımıza sahib çıxmağın, milli irsimizin qorunmasının və dövlətçilik ənənələrimizin davamlılığının rəmzinə çevrildi. Cəbrayılın azadlığı ilə xalqımızın ədalət və tarixi həqiqət uğrunda mübarizəsinin növbəti parlaq səhifəsi yazıldı.
Bu gün Cəbrayıl artıq yalnız Zəfər tariximizin deyil, Böyük Qayıdışın da mühüm ünvanlarından biridir. İşğaldan azad edildikdən sonra şəhərdə genişmiqyaslı quruculuq və abadlıq layihələri həyata keçirilir, müasir infrastruktur yaradılır, yaşayış kompleksləri, məktəblər, sosial və digər obyektlər inşa edilir. Cəbrayıllıların doğma şəhərinə qayıtması Böyük Qayıdış prosesinin ən sevindirici nəticələrindən biridir. Uzun illər yurd həsrəti ilə yaşayan insanların öz ata-baba torpaqlarında yenidən məskunlaşması həm mənəvi, həm də tarixi baxımdan böyük əhəmiyyət daşıyır.
Cəbrayılın gələcək inkişafı ölkəmizin Qarabağ və Şərqi Zəngəzurda həyata keçirdiyi genişmiqyaslı bərpa və quruculuq siyasətinin mühüm istiqamətlərindən biridir. Bu ərazilərdə yaradılan müasir infrastruktur, yeni yaşayış məhəllələri, sosial obyektlər və iqtisadi imkanlar regionun yeni inkişaf mərhələsinə qədəm qoyduğunu göstərir. Cəbrayıl şəhərinin yenidən qurulması həm keçmişin izlərinin bərpası, həm də gələcək nəsillər üçün təhlükəsiz, müasir və firavan yaşayış mühitinin formalaşdırılması baxımından mühüm əhəmiyyət kəsb edir.
4 Oktyabr – Cəbrayıl Şəhəri Günü xalqımızın qəhrəmanlıq tarixini, şəhidlərimizin müqəddəs xatirəsini və doğma torpaqlara qayıdışımızın sevincini özündə birləşdirən əlamətdar gündür. Bu tarix bizə bir daha göstərir ki, Vətən sevgisi, milli birlik və dövlətçilik iradəsi ən böyük sınaqlar qarşısında belə xalqımızı bir amal ətrafında birləşdirə bilir. Cəbrayılın azadlığı uğrunda canından keçən şəhidlərimizin xatirəsi daim ehtiramla yad ediləcək, onların qəhrəmanlığı gələcək nəsillərə örnək olacaqdır. Bu əlamətdar gündə bütün cəbrayıllıları və Azərbaycan xalqını təbrik edir, Cəbrayılın bundan sonra da inkişaf, quruculuq və firavanlıq məkanı kimi daha da çiçəklənməsini arzulayırıq.
Tünzalə Əliyeva,
YAP Nizami rayon təşkilatının məsləhətçisi
