İşğala qədər Qubadlı rayonu Azərbaycanın kənd təsərrüfatı baxımından ən məhsuldar bölgələrindən biri idi. Burada geniş sahələrdə taxıl, üzüm, tütün və bostan məhsulları becərilir, heyvandarlıq inkişaf edirdi. Torpağın bərəkəti, iqlimin əlverişliliyi və insanların zəhmətsevərliyi Qubadlını regionun iqtisadi dayaqlarından birinə çevirmişdi. Hər kəndin öz məhsulu, hər ailənin torpaqla bağlı bir hekayəsi vardı.
İşğal illəri bu bərəkətli torpaqları səssizliyə qərq etdi. Əkin yerləri boş qaldı, təsərrüfat dağıldı, kəndlər viran qaldı. Amma azadlıqdan sonra Qubadlıya həyat yenidən qayıdır. Dövlət tərəfindən həyata keçirilən mühüm infrastruktur layihələri – yeni yollar, elektrik xətləri, su kanalları və aqroparkların salınması bu torpaqların əvvəlki şöhrətini geri qaytarmaq məqsədi daşıyır.
Bu gün Qubadlıda kənd təsərrüfatı bərpa olunur. Yeni texnologiyalar tətbiq edilir, müasir suvarma sistemləri qurulur, heyvandarlıq təsərrüfatları yenidən fəaliyyətə başlayır. Qubadlı fermerləri artıq öz torpaqlarında çalışır, məhsul yığır və rayon iqtisadiyyatının dirçəlişinə töhfə verir.
Qubadlının yeni iqtisadi inkişafı həm keçmişin bərəkətini, həm də gələcəyin ümidini birləşdirir. Bu torpaq bir zamanlar olduğu kimi yenə də bolluğun, zəhmətin və iradənin simvoluna çevrilir. Azadlığın gətirdiyi bu dirçəliş, Qubadlının adını yenidən məhsuldarlığın xəritəsinə yazır.
Sünbül Həsənquliyeva,
YAP Xəzər rayon təşkilatının fəalı
