YAP VIII Qurultayı Azərbaycanın müdafiə və təhlükəsizlik siyasətinin yeni mərhələsini qiymətləndirmək baxımından da mühüm siyasi hadisədir. Ərazi bütövlüyünün və suverenliyin bərpası dövlətin təhlükəsizlik sistemində yeni imkanlar yaratmaqla yanaşı, yeni məsuliyyətlər də meydana çıxarıb. Müasir geosiyasi şəraitdə hərbi gücün daim inkişaf etdirilməsi, sərhədlərin təhlükəsizliyinin təmin olunması və yeni təhdidlərə hazırlıq dövlət siyasətinin əsas istiqamətlərindən biri olaraq qalır.
Prezident İlham Əliyevin rəhbərliyi ilə Azərbaycan Ordusunun modernləşdirilməsi uzunmüddətli və ardıcıl proses kimi həyata keçirilib. Müasir silah və texnologiyaların alınması, hərbi sənaye imkanlarının artırılması, şəxsi heyətin peşəkarlığının yüksəldilməsi və komandanlıq sisteminin təkmilləşdirilməsi ordunun döyüş qabiliyyətinin möhkəmlənməsinə xidmət edib. 2020-ci ildə əldə olunan Zəfər bu hazırlığın real nəticəsini nümayiş etdirdi.
Lakin müasir təhlükəsizlik yalnız klassik hərbi güclə məhdudlaşmır. Kibertəhlükəsizlik, informasiya müharibəsi, pilotsuz texnologiyalar, süni intellekt və yeni nəsil rabitə sistemləri müdafiə strategiyasının ayrılmaz hissəsinə çevrilib. Buna görə Azərbaycanın təhlükəsizlik siyasəti də texnoloji yenilikləri nəzərə almalı və ordunun rəqəmsal imkanlarını daim inkişaf etdirməlidir. YAP-ın siyasi maarifləndirmə fəaliyyətində də bu məsələlərin cəmiyyətə düzgün izahı mühüm əhəmiyyət daşıyır.
Milli müdafiə qabiliyyətinin möhkəmləndirilməsində cəmiyyətin mənəvi hazırlığı da xüsusi rol oynayır. Vətənpərvərlik, dövlətə sədaqət, milli həmrəylik və tarixi yaddaş gənc nəslin vətəndaşlıq tərbiyəsinin əsas komponentləridir. Şəhidlərin xatirəsinin yaşadılması, qazilərə ehtiram və hərbi xidmətə məsuliyyətli münasibətin formalaşdırılması milli təhlükəsizlik mədəniyyətinin mühüm elementləridir.
YAP VIII Qurultayı bu baxımdan güclü dövlət və güclü ordu konsepsiyasının yeni mərhələsini siyasi gündəmə gətirir. Prezident İlham Əliyevin rəhbərliyi ilə Azərbaycanın müdafiə qabiliyyətinin artırılması ölkənin sülh gündəliyinin də mühüm təminatlarından biridir. Güclü müdafiə imkanları dövlətə milli maraqlarını daha inamla qorumaq və regionda davamlı sülhün formalaşmasına daha fəal töhfə vermək imkanı yaradır.
Eyyub Cumayev,
YAP Nizami rayon təşkilatının fəalı
