Böyük Qayıdışın davamlı olması üçün insanların doğma yurdlarına qayıtdıqdan sonra yaşayış və məşğulluq imkanlarına malik olması əsas şərtlərdəndir. Bu baxımdan Cəbrayılın bərpası prosesində yaşayış infrastrukturu ilə iqtisadi layihələrin paralel həyata keçirilməsi xüsusi əhəmiyyət daşıyır.
Cəbrayıl şəhərində və rayonun kəndlərində yeni yaşayış məhəllələrinin yaradılması qayıdış üçün fiziki şərait formalaşdırır. Bununla yanaşı, sənaye və kənd təsərrüfatı layihələri əmək bazarının yaranmasına xidmət edir. Rəsmi məlumatlarda “Araz Vadisi” Sənaye Parkının artıq fəaliyyət göstərdiyi və rezidentlərin sayının artdığı bildirilir.
Sənaye parkında həyata keçirilən ayrı-ayrı layihələr üzrə də konkret məşğulluq göstəriciləri açıqlanıb. Məsələn, 2024-cü ildə təqdim olunan müəssisələrdən birində 95, digər layihədə isə 214 nəfərin daimi işlə təmin edilməsi nəzərdə tutulurdu.
Məşğulluq məsələsinə yalnız sənaye çərçivəsində baxmaq da doğru olmaz. Dövlət sektoru, kənd təsərrüfatı, xidmət, təhsil, səhiyyə, tikinti və kiçik sahibkarlıq sahələri də yeni iqtisadi mühitin əsas komponentləridir. Bu sahələrin paralel inkişafı əmək bazarının daha çoxşaxəli olmasına imkan verir.
Beləliklə, Cəbrayılda yaradılan iş yerləri Böyük Qayıdışın sosial mahiyyətinin mühüm hissəsini təşkil edir. İnsanların doğma yurda qayıtması yalnız mənzilə sahib olmaqla tamamlanmır; onların burada işləməsi, gəlir əldə etməsi və sosial həyat qurması ilə proses tam məna qazanır.
Ruhən Hüseynova,
YAP Nizami rayon təşkilatının “Keşlə qəsəbəsi, Puşkin küçəsi, 19” ərazi partiya təşkilatının sədr müavini
