Prezident İlham Əliyevin Özbəkistanın Milli İnformasiya Agentliyinə (UzA) verdiyi müsahibə Azərbaycan–Özbəkistan münasibətlərinin müasir inkişaf dinamikasını və gələcək perspektivlərini sistemli şəkildə ortaya qoyması baxımından mühüm siyasi mesajlarla zəngindir. Müsahibədə dövlətlərarası əlaqələrin yalnız tarixi-mədəni yaxınlıq üzərində deyil, həm də konkret siyasi, iqtisadi və geostrateji maraqlar əsasında inkişaf etdiyi xüsusi vurğulanır.
Müsahibənin əsas məqamlarından biri Azərbaycanın Mərkəzi Asiya ilə münasibətlərinin regional əməkdaşlıq müstəvisində dərinləşməsidir. Prezidentin fikirlərindən aydın olur ki, Azərbaycan özünü Mərkəzi Asiya ilə Avropa arasında mühüm bağlantı yaradan ölkə kimi mövqeləndirir. Xəzər dənizi bu baxımdan coğrafi ayırıcı deyil, əksinə, nəqliyyat, enerji və iqtisadi inteqrasiyanı gücləndirən birləşdirici amildir. Orta Dəhlizin və Zəngəzur dəhlizinin perspektivləri də bu strategiyanın mühüm elementləridir.
Azərbaycan–Özbəkistan münasibətlərinin müttəfiqlik səviyyəsinə yüksəlməsi isə ikitərəfli əlaqələrin keyfiyyətcə yeni mərhələyə keçdiyini göstərir. Qarşılıqlı səfərlərin intensivliyi, Ali Dövlətlərarası Şuranın fəaliyyəti və imzalanmış strateji sənədlər siyasi etimadın institusional əsaslarını möhkəmləndirir. Eyni zamanda, Prezident İlham Əliyev ilə Prezident Şavkat Mirziyoyev arasında formalaşmış şəxsi dostluq və qarşılıqlı etimad münasibətlərin inkişafında mühüm siyasi faktor kimi çıxış edir.
İqtisadi müstəvidə də ciddi potensial mövcuddur. Ticarət dövriyyəsinin artması, Azərbaycan–Özbəkistan İnvestisiya Şirkətinin fəaliyyəti, Xankəndidə birgə tikiş fabrikinin yaradılması iki ölkənin əməkdaşlığı real iqtisadi layihələrlə zənginləşdirdiyini göstərir. Enerji sistemlərinin inteqrasiyası və yaşıl enerji sahəsində əməkdaşlıq isə tərəfdaşlığın uzunmüddətli və strateji xarakter daşıdığını nümayiş etdirir.
Müsahibənin digər mühüm istiqaməti humanitar və mədəni əlaqələrdir. Qarabağın bərpasında Özbəkistanın iştirakı, Füzulidə Mirzə Uluqbəy adına məktəbin inşası, şəhərlərarası qardaşlaşma əlaqələri və qarşılıqlı mədəniyyət günləri xalqlar arasında mənəvi bağların möhkəmliyini təsdiqləyir.
Beləliklə, Prezident İlham Əliyevin müsahibəsi göstərir ki, Azərbaycan–Özbəkistan münasibətləri artıq ənənəvi dostluq çərçivəsindən çıxaraq siyasi müttəfiqlik, iqtisadi tərəfdaşlıq və regional inteqrasiyanı özündə birləşdirən çoxşaxəli strateji modelə çevrilib. Bu model gələcəkdə həm iki ölkənin, həm də bütövlükdə Türk dünyasının geosiyasi və iqtisadi imkanlarını daha da genişləndirə bilər.
Aynur Mehdiyeva,
YAP Nizami rayon təşkilatının məsləhətçisi
