Azərbaycan Respublikasının Prezidenti İlham Əliyevin xarici ölkələrə etdiyi rəsmi və işgüzar səfərlər zamanı diaspor nümayəndələri ilə görüşləri dövlətin diaspor siyasətində xüsusi yer tutur. Bu görüşlər Ulu Öndər Heydər Əliyev tərəfindən əsası qoyulmuş milli diaspor quruculuğu ənənəsinin davamı olmaqla yanaşı, müasir dövrdə Azərbaycanın milli maraqlarının qorunması və təbliği baxımından mühüm əhəmiyyət daşıyır. Prezident İlham Əliyev bütün səfərləri çərçivəsində xaricdə yaşayan azərbaycanlılarla bir araya gəlir, onların fəaliyyəti ilə maraqlanır, problemlərini dinləyir və gələcək fəaliyyət istiqamətləri barədə tövsiyələrini verir.Dövlət başçısı dəfələrlə vurğulamışdır ki, mürəkkəb və ziddiyyətli beynəlxalq proseslərin getdiyi bir dövrdə güclü diaspora Azərbaycanın müstəqilliyinin möhkəmləndirilməsi, ölkənin haqq səsinin dünyaya çatdırılması baxımından strateji əhəmiyyətə malikdir. Xaricdə yaşayan soydaşlarımızın təşkilatlanması, vahid məqsəd ətrafında birləşməsi və yaşadıqları ölkələrin ictimai-siyasi həyatında fəal iştirakı Azərbaycanın beynəlxalq mövqelərinin güclənməsinə xidmət edir. Prezident İlham Əliyevin diaspor nümayəndələri ilə görüşlərində bu məsələlər daim ön planda olur.
Prezidentin Fransa, Rusiya, Slovakiya, Qazaxıstan, Özbəkistan, Türkiyə, Polşa, Belçika, Ukrayna, Gürcüstan, Moldova, Almaniya, ABŞ, Rumıniya, İngiltərə və digər ölkələrə səfərləri zamanı diasporla bağlı məsələlər prioritet mövzulardan biri kimi diqqət mərkəzində saxlanılmışdır. Bu görüşlərdə diaspor təşkilatlarının fəaliyyəti, qarşılaşdıqları çətinliklər, erməni lobbisinin apardığı təbliğata qarşı mübarizə üsulları, eləcə də Azərbaycan mədəniyyətinin və tarixinin tanıdılması məsələləri müzakirə olunur. Prezident İlham Əliyev diaspor nümayəndələrini daha fəal olmağa, milli maraqlarımızı qorumaq üçün koordinasiyalı şəkildə fəaliyyət göstərməyə çağırır.Diasporla görüşlər təkcə problemlərin dinlənilməsi ilə məhdudlaşmır, eyni zamanda motivasiyaedici xarakter daşıyır. Dövlət başçısının diqqəti və dəstəyi xaricdə yaşayan azərbaycanlılarda Vətənə bağlılıq hissini gücləndirir, onların milli kimliyini qorumasına stimul verir. Prezident İlham Əliyev çıxışlarında Azərbaycan dövlətinin hər zaman diasporun yanında olduğunu, onların fəaliyyətinə siyasi və mənəvi dəstək verdiyini xüsusi vurğulayır. Bu yanaşma diaspor təşkilatlarının daha sistemli və məqsədyönlü işləməsinə şərait yaradır.Xüsusilə Vətən müharibəsindən sonra Prezident İlham Əliyevin diasporla görüşlərində Azərbaycanın haqq işinin beynəlxalq aləmdə düzgün çatdırılması, informasiya müharibəsində fəallığın artırılması mühüm mövzu kimi önə çıxmışdır. Dövlət başçısı diaspor nümayəndələrini sosial media, ictimai tədbirlər və yerli media vasitəsilə Azərbaycanın mövqeyini müdafiə etməyə çağırmışdır.
Nəticə etibarilə, Prezident İlham Əliyevin xarici səfərləri zamanı diaspor nümayəndələri ilə görüşləri Azərbaycan dövlətinin diaspor siyasətinin ardıcıl, məqsədyönlü və strateji xarakter daşıdığını nümayiş etdirir. Bu görüşlər dünya azərbaycanlılarının birliyinin möhkəmlənməsinə, milli maraqların beynəlxalq səviyyədə qorunmasına və Azərbaycanın müstəqil dövlət kimi mövqeyinin daha da güclənməsinə mühüm töhfə verir.
Pərvin Cəfərli,
Yeni Azərbaycan Partiyası,məsləhətçi
