Azərbaycan tarixində 2023-cü ilin payızı və qışı həm siyasi, həm də mədəni-idman baxımından mühüm hadisələrlə yadda qaldı. 20 sentyabr 2023-cü ildə keçirilən antiterror tədbirləri nəticəsində Xankəndi, Xocalı, Xocavənd və Ağdərə şəhərlərində dövlətimizin suverenliyi tam bərpa olundu. Bu qələbə Azərbaycan xalqının uzun illərdən bəri həsrətində olduğu torpaqlara qovuşmasının təntənəsi idi. Qısa müddət sonra – həmin ilin 21 dekabrında isə Ağdamın “Qarabağ” futbol klubu Azərbaycan kubokunun 1/8 final mərhələsində oyununu məhz Xankəndidə keçirməklə bu zəfərin idman müstəvisində təcəssümünü yaratdı.
“Qarabağ” klubu özü də Azərbaycan tarixində xüsusi yeri olan bir rəmzdir. 1993-cü ildə Ağdamın işğalı nəticəsində doğma meydanından didərgin düşən komanda uzun illər ölkənin müxtəlif stadionlarında məskunlaşdı. Buna baxmayaraq, o, nə adını, nə də kimliyini dəyişdi. “Qarabağ” bütün dövrlərdə xalqın yaddaşında doğma yurdun, sarsılmaz ruhun və mübarizə əzminin simvoluna çevrildi. Elə buna görə də komandanın Xankəndidə oyuna çıxması sadəcə bir idman hadisəsi deyil, həm də tarixi ədalətin bərpasının rəmzi kimi qəbul edildi.
21 dekabrda baş tutan qarşılaşma həm futbolçular, həm də azarkeşlər üçün böyük emosional yük daşıyırdı. Çünki bu, işğaldan azad olunmuş ərazidə keçirilən ilk rəsmi futbol matçı idi. Tribunaları dolduran tamaşaçıların qüruru, meydanda səslənən Azərbaycan himni, stadion üzərində dalğalanan üçrəngli bayraq hər bir vətəndaşa “Biz geri döndük” mesajını verdi. Oyunun nəticəsindən asılı olmayaraq, həmin günün mənəvi dəyəri ölçüyəgəlməz idi.
Bu hadisə həm də Qarabağın bərpası və yenidənqurulmasının bariz göstəricilərindən biri oldu. Çünki idman tədbirlərinin keçirilməsi bölgədə təhlükəsizliyin, sülhün və inkişafın təmin olunmasından xəbər verirdi. “Qarabağ”ın Xankəndidəki oyunu bir tərəfdən gənc nəslə motivasiya mənbəyi oldu, digər tərəfdən isə bütün dünyaya Azərbaycanın Qarabağda həyatın normal axarını bərpa etdiyini nümayiş etdirdi.
Xüsusi vurğulamaq lazımdır ki, “Qarabağ” klubu illər boyu yalnız ölkədaxili turnirlərdə deyil, həm də Avropa arenasında böyük uğurlar qazanaraq Azərbaycanın səsini dünyaya çatdırdı. Onların Xankəndidə meydana çıxması isə bu uğurların ən şərəfli səhifələrindən biri kimi tarixə düşdü. Bu, həm də şəhidlərin ruhuna ehtiram, məcburi köçkünlərin illərlə çəkdiyi həsrətin bitməsi demək idi.
Nəticə etibarilə, 20 sentyabr 2023-cü ilin zəfəri ilə başlayan yol dekabrın 21-də “Qarabağ” komandasının Xankəndidəki oyunu ilə davam etdi. Bu tarix həm idmansevərlər, həm də bütövlükdə Azərbaycan xalqı üçün unudulmaz gündür. Çünki bu qarşılaşma yalnız bir futbol matçı deyil, qayıdışın, dirçəlişin və milli qürurun təntənəsi idi. Qarabağın ürəyi olan Xankəndidə futbolun səsi bir daha göstərdi ki, bu torpaqlar əbədi olaraq Azərbaycanındır.
Sevinc Qəhrəmanova ,
Yeni Azərbaycan Partiyası,məsləhətçi
