Azərbaycan Respublikasının Prezidenti İlham Əliyev 26 avqust 2025-ci il tarixində Səudiyyə Ərəbistanının nüfuzlu “Əl-Ərəbiyyə” telekanalına müsahibə verib. Dövlət başçısının çıxışı həm regional, həm də qlobal miqyasda geniş maraqla qarşılanıb.
Müsahibə zamanı Prezident İlham Əliyev ölkəmizin həyata keçirdiyi daxili və xarici siyasət kursundan, regionda baş verən mühüm proseslərdən danışıb. O, xüsusilə Azərbaycan ilə Ermənistan arasında davam edən sülh danışıqlarına diqqət çəkərək, sülh müqaviləsinin imzalanmasının bölgədə sabitlik və əməkdaşlıq üçün açar rol oynadığını vurğulayıb.
Dövlət başçısı həmçinin Azərbaycanın iqtisadi inkişafı, enerji təhlükəsizliyi sahəsində gördüyü işlər və beynəlxalq tərəfdaşlarla əməkdaşlığın genişləndirilməsi barədə ətraflı məlumat verib. Prezident qeyd edib ki, Azərbaycan regional əməkdaşlıq platformalarında fəal iştirak edir və qlobal enerji bazarında etibarlı tərəfdaş kimi tanınır.
Müsahibədə Azərbaycanın İslam dünyası ilə münasibətləri də xüsusi olaraq ön plana çəkilib. İlham Əliyev vurğulayıb ki, Azərbaycan İslam həmrəyliyinə daim sadiqdir və Səudiyyə Ərəbistanı ilə dostluq münasibətlərini daha da inkişaf etdirməyə böyük önəm verir.
Prezident İlham Əliyevin “Əl-Ərəbiyyə” kanalına müsahibəsi ölkəmizin beynəlxalq ictimaiyyət qarşısında mövqeyini bir daha nümayiş etdirdi. Bu çıxış Azərbaycan diplomatiyasının uğurlu nümunəsi olmaqla yanaşı, həm də regionda davamlı sülhə və tərəfdaşlığa çağırış kimi dəyərləndirilir.
İldırım Eyvazlı
YAP-ın gənc fəalı
