Azərbaycan və Pakistan arasındakı qardaşlıq əlaqələri tarixi köklərə, ortaq dəyərlərə və qarşılıqlı hörmətə əsaslanır. Hər iki ölkə beynəlxalq platformalarda daim bir-birini dəstəkləyir və strateji əməkdaşlıqlarını gücləndirir. Prezident İlham Əliyevin və Baş nazir Məhəmməd Şahbaz Şərifin son görüşü bu tərəfdaşlığın yeni mərhələyə keçidini göstərir.
İkitərəfli münasibətlərin ən vacib istiqamətlərindən biri iqtisadi əməkdaşlıqdır. Pakistan və Azərbaycan ticarət dövriyyəsini artırmaq, investisiya imkanlarını genişləndirmək və enerji sektorunda ortaq layihələr həyata keçirmək üçün fəal addımlar atır. Azərbaycan qazının Pakistan bazarına çıxarılması və nəqliyyat əlaqələrinin inkişafı mühüm məsələlər sırasındadır.
Hərbi sahədə də sıx əməkdaşlıq mövcuddur. Azərbaycan və Pakistan silahlı qüvvələri arasında təcrübə mübadiləsi, ortaq hərbi təlimlər və müdafiə sənayesi sahəsində əməkdaşlıq ölkələrimizin təhlükəsizlik sahəsində daha da yaxınlaşmasını təmin edir. Bu istiqamətdə yeni təşəbbüslərin həyata keçirilməsi də müzakirə olunub.
Mədəniyyət və təhsil sahəsində əlaqələrin genişləndirilməsi də mühüm əhəmiyyət kəsb edir. Universitetlər arasında tələbə mübadiləsi, elmi tədqiqatların birgə aparılması və mədəni tədbirlərin təşkili Azərbaycan və Pakistan xalqları arasında dostluq bağlarını möhkəmləndirir. Bu, gələcək nəsillər üçün daha sıx əlaqələrin formalaşmasına xidmət edəcək.
Azərbaycan və Pakistan arasında bu cür dostluq münasibətlərinin olması iki qardaş müsəlman ölkəsinin güclü tərəfdaşlıq nümunəsi kimi qiymətləndirilir. Ölkələrimiz arasındakı dinamika qarşılıqlı inamın və strateji əməkdaşlığın möhkəmləndiyini bir daha nümayiş etdirir.
Günay Şahverdiyeva,
YAP Xəzər rayon təşkilatının fəalı
